La suprastanza communala da Silvaplauna scriva en ses rapport dal matg, ch'ella haja surdà in studi da realisabladad davart l'utilisaziun da la chalur dal lai da Silvaplauna. Quel studi duai sclerir sche l'interess da las chasadas da las trais fracziuns Silvaplauna, Surlej e Champfèr è avant maun da sa participar a la cuminanza.
Stgaudar ina gronda part da las abitaziuns
Tenor emprimas evaluaziuns saja quai pussaivel da retrair radund 35 GWh chalur l'onn. Actualmain dovran tut ils stgaudaments da l'entira vischnanca 44 GWh. Quellas evaluaziuns haja era mussà che las valurs da mesiraziuns possian vegnir tegnidas en. L'aua dal lai sa sfradentass per radund in mez grad, quai che n'avess naginas consequenzas per l'ecologia, scriva la suprastanza communala.
Sch'il studi da realisabladad vegn ad ina conclusiun positiva duai la planisaziun da las centralas d'energia cumenzar. Previs è da construir trais centralas, ina en mintga fracziun. Realisà vegniss il project da l'EWZ e da San Murezzan Energia, che nizzegia gia dapi 10 onns la chalur or dal lai da San Murezzan per stgaudar la gronda part da las chasadas da San Murezzan Bagn.
