Tranter auter pertutga la crisa da corona il sectur turistic. Perquai vul sper il chantun e la Confederaziun er gidar la vischnanca da Segl als affarists turistics indigens. Il cussegl communal ha pia decidì da vulair pajar enavos a tut ils pertutgads in terz da la taxa da turissem gia pajada. Quai ha ditg il president communal da Segl, Christian Meuli. Total è quai in import da bundant 400’000 francs.
Pervia che l’affar surpassa la cumpetenza dal cussegl communal, ha el da vegnir suttamess a la radunanza communala. Ina buna premissa per far quel pass è tenor Meuli il fatg Segl spetgia in bun rendaquint 2019.
Votaziun a l’urna
Causa che radunanzas communalas n’èn actualmain betg pussaivlas, è prevesida ina votaziun a l’urna. Tar quest affar sa tracti numnadamain d’in affar urgent – ils partenaris hajan da basegn agid immediatamain – uschè Christian Meuli. La votaziun a l’urna è prevesida anc durant il matg.