Gia oz tegna la vischnanca da Schlarigna 89 aczias à nominal 100 francs vi dal hotel Cresta Palace. Uss duai questa participaziun vegnir augmentada per ulteriurs 400'000 francs. Davart questa fatschenta decida la radunanza communala ils 5 d'october.
L'hotel Cresta Palace ha decidì d'augmentar il chapital d'aczias per maximalmain 7,2 milliuns francs. Quai per sanar las stanzas ed ils indrizs sanitaris. Ils dus acziunaris principals han empermess da sustegnair quai cun imports considerabels. L'hotel ha dentant era dumandà la vischnanca, sch'ella veglia sa participar a questa suttascripziun d'aczias.
Sco la suprastanza communala scriva en la missiva è ella da l'avis, che l'hotel saja impurtant per la vischnanca turistica Schlarigna e ch'igl è perquai en l'interess da la vischnanca dad al sustegnair.