Ils scolars e las scolaras dal stgalim aut da San Murezzan duain restar a San Murezzan. Quai pretenda in'iniziativa ch'è vegnid'a lantschada a San Murezzan. Sco quai che la co-inizianta Esther Pfäffli ha ditg envers RTR, hajan els lantschà l'iniziativa perquai ch'els hajan a San Murezzan 100 scolaras e scolars dal stgalim superiur, da San Murezzan, Silvaplauna e Segl, e quels duajan era restar là.
Nus na vesain betg la raschun pertge che quels 100 giuvenils duajan en il futur ir a Samedan a scola. Nus vulain tegnair la scola en vischnanca.
La Regiun Malögia è entant vi d'evaluar ina collavuraziun da las scolas dal stgalim aut dala regiun. L'idea è da furmar in center da scola tranter Segl e Bever e cunquai avair in lieu da scola per tuts. Il parlament da San Murezzan aveva decis unanimamain da persequitar vinavant quest project.
Ils iniziant han ussa temp 4 mais per ramassar las 400 suttascripziuns per lur intent.