La mitad da settember ha gì lieu il davos concert dal St. Moritzer Salonorchester. La nova strategia, communitgada da San Murezzan, prevesa ina nov program cun plirs ensembles. Plinavant ha l’anteriur intendant, Jürg Frei, chalà sia lavur suenter passa 40 onns. Da nov dessan gist trais persunas manar enavant ils concerts sur stad, numnadamain Andres Joho, Raimund Wiederkehr e Samuel Zünd.
Betg tuts èn perencletgs cun la nova strategia
L’anteriur intendant Frei ha infurmà ad RTR ch’el haja dubis quai che reguarda la realisaziun dal nov program cun differents ensembles. Plinavant è Anton Ludwig Wilhalm, in dals musicants dapi radund 25 onns, ferm dischillus da la furma sco ch’els en vegnids infurmads da questas midadas.
Ins ha l’impressiun che la lavur prestada dal anteriur orchester n’è betg vegnida stimada
Il responsabel cultura sa dosta
Christoph Bürge sa dosta. Ils concerts da stad na vegnian betg stritgads, i dat in midament dal stil da musica. Plinavant vegnian dapli ensembles ad avair la pussaivladad da sunar. Cun questa strategia prevesan ins da gudagnar oravant tut era in public pli giuven. Tenor el hajan ins infurmà a temp sur dal midament.
Las discussiuns n'èn anc betg finidas. Bürge ha infurmà da vulair tschertgar il discurs. Ma il fatg che il orchester tradiziunal va a fin, quai è segir.