Dapi l’onn 2009 cuzza gia la planisaziun per remplazzar la pendiculara Signal che ha en il fratemp 52 onns. Ussa, suenter in temp da planisaziun da 15 onns, vegn il project surlavurà per la pendiculara da Signal a San Murezzan inoltrà il schaner tar l'Uffizi federal da traffic, scriva la Engiadina San Murezzan Mountain SA.
L'emprima dumonda d'approvaziun è vegnida inoltrada il zercladur 2014 a l'Uffizi federal da traffic UFT. Il mars 2018 ha l'UFT approvà il plan per la realisaziun. Cunter la permissiun hai dà recurs da differentas abitantas e da differents abitants fin tar il Tribunal federal. Il zercladur 2023 ha il Tribunal federal decidì da franar il project.
Il Tribunal federal aveva motivà sia decisiun cunzunt cun ina violaziun da la lescha da guaud, perquai che – cuntrari a las instanzas precedentas – ils documents da planisaziun consegnads na sajan ord lur vista betg suffizients.
Il project oriund per ina telecabina da 10 che datescha da l'onn 2014 saja vegnì surlavurà cumplettamain per ademplir las directivas dal Tribunal federal. Sco l'Engiadina Mountains SA scriva, haja in'analisa cumplessiva e ponderaziun dals interess tranter differents lieus sco er differents sistems mussà ch'il nov sistem planisà cun telecabinas dad 8 saja la soluziun ecologica, economica e socialmain la pli persistenta.
Ultra da quai han las votantas ed ils votants da San Murezzan approvà ils 24 da november 2024 cun passa 86% vuschs in'adattaziun da l'urden da zonas per la staziun da val ed èn s'exprimidas uschia cleramain per ina nova pendiculara da signal.
-
Bild 1 von 2Legenda: Engadin St. Moritz Mountains AG
-
Bild 2 von 2Legenda: Engadin St. Moritz Mountains AG
Pli pauc guaud stuess vegnir runcà
Sch'ins remplazzass la pendiculara existenta da l'onn 1972 tras ina nova, stuess vegnir runcà per quai bundant trais giadas uschè bler guaud sco ch'igl è necessari per construir la nova telecabina dad otg, èsi scrit vinavant en la communicaziun. Plinavant sa reduceschian ils temps da spetga, e tuts hajan ina plazza da seser.
Tras in sistem da gestiun flexibel possian ins duvrar be tantas cabinas sco quai ch'ins dovria effectivamain, quai che reduciss il diever d'energia. Tenor Thomas Brunner, manader tecnic da las pendicularas, vegnia il project a custar circa 40 milliuns francs. Sch'il nov project vegn approvà e sch'i na dat naginas protestas, possia la nova telecabina Signal vegnir averta a partir da l'enviern 2027/28.