Il Tribunal federal approva il recurs da set persunas ch'èn possessurs d'immobiglias vischinantas – ed ina firma – e schlia tant la decisiun da la Dretgira administrativa dal Grischun (december 2020) sco era il plan d'areal relaschà da la suprastanza da Samedan (november 2018). Ils surpassaments dal plan d'areal sajan da giuditgar pli sever, perquai ch'il plan saja vegnì decidì da la suprastanza senza votaziun a l'urna.
Bain legitim – però cun mesira
Quai saja bain legitim, scriva il Tribunal federal, haja quatras però ina legitimaziun democratica pli pitschna, uschia ch'ils surpassaments sajan da giuditgar da moda pli severa. Ed en il plan d'areal vegnia per exempel la lunghezza maximala per in bajetg (90 meters) surpassada per il factur trais da l'urden fundamental che lubescha la lunghezza maximala da 30 meters).
Chantun sto ir sur ils cudeschs
L'areal en dumonda cumpeglia radund 12'000 m² e s'extenda sur il parcadi actual, ils bajetgs da la Viafier retica, la remisa veglia, la plazza da la staziun e parts da la Via Retica e la Via Promulins. Radund la mesadad da quest areal era previsa per in dals nov centers regiunals ch’il chantun planisescha per restructurar e simplifitgar l'organisaziun da l'administraziun chantunala (project «Sinergia»). In center che duai dar suttetg ad uffizis dal chantun ed a la guardia da cunfin.
