La scola media a Samedan datti dapi bundant 80 onns – dapi 30 onns è ella organisada sco societad anonima (SA). Ils 10 da zercladur ha lieu la 30avla radunanza generala. Fundada era la SA vegnida il 1991 per salvar la scola ch'aveva da quel temp divers problems. Dapi lura saja ella sa sviluppada bain, di il president dal cussegl administrativ Thomas Malgiaritta. Las cifras da scolaras e scolars dal gimnasi, dal 10avel onn da scola ed era da studentas e students da la scola da turissem sajan constantas. En media haja l'Academia Engiadina SA var 250 scolaras e scolars e 160 studentas e students.
La pli gronda sfida sajan las finanzas. Sco societad anonima saja l'Academia Engiadina bain deliberada da las taglias. Sco scola mez publica saja ella dentant era dependenta da contribuziuns dal maun public – ed uschia era dad ina tscherta cifra da scolaras e studentas.
3 gimnasis en l'Engiadina – concurrenza e collavuraziun
Speziala è la situaziun ch'i dat trais gimnasis en l'Engiadina:
- l'Institut Otalpin a Ftan,
- il Lyceum Alpinum a Zuoz
- e l'Academia Engiadina a Samedan.
Questa situaziun da concurrenza fetschia tenor Thomas Malgiaritta bain per restar londervi. Ins haja dentant in bun contact in cun l'auter, e mintga scola haja ses dretg d'existenza. Ina pussaivla fusiun era vegnida discutada l'onn 2003 – aveva però fatg naufragi gia suenter curt temp. Dapi lura n'era quai mai pli stà in tema.
L'onn 2021 – relativ constant
Tenor il rapport annual han durant l'onn 2021 frequentà 220 scolaras e scolars la scola media (213 l'onn avant) e 176 studentas e students la scola spezialisada superiura da turissem (HFT). La svieuta è stada tar 13,6 milliuns francs (l'onn avant 12,5 miu. fr.) ed il gudogn tar 7700 francs (l'onn avant 47'600). La sfida principala saja stada la pandemia, ch'ins haja dumagnà cun success grazia ad uraris flexibels, il livestream dal concert dal coro ed in eveniment per collavuraturs dadora.
L'Academia Engiadina SA consista d'ina scola media, d'ina scola spezialisada (sanadad e pedagogia), dal 10avel onn da scola, da la scola da turissem, da l'institut per glaziologia e da la partiziun da furmaziun. Ella ha bundant 110 collavuraturas e collavuraturs.