L'Engadin Ultra Trail, attira en sia quarta ediziun quest onn circa 550 participants e participantas. Durant 25 uras, da venderdi las 23:00 fin la sonda da mesanotg han ils participants e participantas cumbattì per il meglier temp sin ils trajects. La partenza e la finiziun da la cursa è stà a Samedan.
Ils quatter trajects da 16, 23, 53 e 102 kilometers attiran bundant 40% dapli curridurs e curriduras che las ediziuns precedentas. Sco ch’il president dal comité d’organisaziun da la cursa Reto Franziscus declera, sajan las cifras fitg allegraivlas.
La nischa perfetga
En vista dals proxims onns, saja quest trend per ils organisaturs ed organisaturas era encuraschant. Maximalmain pon 800 persunas sa participar a l’event, 200 per mintgin dals quatter trajects. Ils plans per l’avegnir na prevesan betg da crescher sur quest punct or.
La tschertga da voluntaris pli simpla che pensà
L’organisaziun per uschè in event però saja difficila. La segirtad dals curridurs e curriduras è l'emprima prioritad. Bundant 80 voluntaris e las voluntarias basegna la cursa, era per segirar ils trajects ed alimentar ils participants e participantas, di Reto Franziscus. La tschertga da gidanters e gidantras saja stà pli simpel sco anticipà. Uss han ils organisaturs e organisaturas però ensemen ina clicca cumpacta da glieud ch'è activa en il sport da currer e vegn gugent a gidar tar quest event.
Da chattar voluntaris è stà pli simpel che pensà.
Ultimas lavurs
En l’emna avant il event, han ils organisaturs e las organisaturas da l'Engadin Ultra Trail però stuì spalar naiv en tschertas parts dals trajects. Quai per procurar che las sendas sajan passablas e segiras.