A Samedan ha brischà glindesdi saira ina chasetta da rument. Sco quai che la polizia chantunala dal Grischun scriva haja probablamain cumenzà a brischar perquai ch'insatgi n'haja betg dismess a moda confurma cigarettas u autra rauba ch'ins po fimar.
Ils pumpiers da Samedan-Puntraschigna han gì in exercizi cura ch'els han survegnì l'alarm che la chasetta brischia. Ils donns muntan a passa 5'000 francs.