La primavaira arriva e velocipedists e motociclists sa legran da pudair far viadis sur ils differents pass. In pass popular è il pass da l’Umbrail che collia la Val Müstair cun l’Italia. Actualmain è la via sur il pass però anc cuverta cun massas da naiv. Ils collavuraturs da l’uffizi da construcziun bassa han cumenzà avant duas emnas cun las lavurs da rumida.
La lavur sin ils auts e tranter costas stipas n’è betg da sutvalitar. Las temperaturas da primavaira pon chaschunar adina puspè per lavinas spontanas. Peder Caviezel, il responsabel per la segirezza, valitescha perquai regularmain la situaziun. Ses collavuraturs pon numnadamain be lavurar sche la segirezza è dada. Quai è quests dis il cas, grazia las temperaturas bassas. Uschè è el da buna speranza, da pudair avrir il pass da l’Umbrail sco mintg’onn la fin da matg, principi da zercladur.
