Avant 4 onns ha l’organisaziun dal campiunadi mundial da Freestyle en Engiadin’Ota survegnì la finanziaziun necessaria per organisar las cumpetiziuns da sport. En tut ha il man public finanzià l’event cun 13 milliuns francs. Las vischnancas da la regiun Malögia han contribuì 4 milliuns francs.
Custs creschids
Dentant è il budget creschì sin 18 milliuns francs. Cun elavurar e precisar il budget, ha l’organisaziun dal campiunadi mundial badà, che probablamain na bastan quests meds betg. Il factur principal è stà, che durant las duas emnas da cumpetiziun la fin da mars 2025 n’è betg segir sche i ha avunda naiv. Cun pauca naiv natirala è da far quint cun custs gronds per ennavar. Era l’aura na possian ins preveder, e quai saja era ina gronda intschertezza.
Ina garanzia da deficit
Usche han ils responsabels e responsablas inoltrà la dumonda a las vischnancas da l’Engiadin’Ota, sche quellas pudessan surpigliar in eventual deficit da 2 milliuns francs. Era sche tenor il president dal campiunadi mundial da Freestyle 2025, Sigi Asprion, n’è betg ditg che l’event fatscha deficit, va l’organisaziun ora d’in model simpel. En il meglier cas fa il campiunadi mundial in gudogn da 150’000 francs ed en il pli nausch cas appunto 2 milluns francs defizit
Vischnancas betg cuntentas
En differentas vischnancas è la decisiun gia vegnida tratta. A Samedan, Zuoz e Schlarigna han las suprastanzas communalas decis da betg aderir la garanzia. Sco motiv principal din questas vischnancas, che l’organisaziun ha survegnì gia uss avunda raps. Ed ellas na sajan betg pli prontas da dar dapli raps. En cas da Puntraschigna e Segl, dattan questas duas vischnancas mintgamai 50’000 francs. Ed er il sustegn da San Murezzan è segirà per il campiunadi, e quai cun 1.1 milliuns.
Tschertgar autras soluziuns
L’organisaziun dal campiunadi da Freestyle 2025 vul uss guardar sco ch'i van vinavant. Els han gia inoltrà ina dumonda per la garanzia da deficit tar il chantun Grischun ed era tar la Confederaziun. Sche quai na funcziuna betg, dess vegnir spargnà tar il program da divertiment. Tenor il president da l’organisaziun fiss quai il pli mal.
