Suenter 35 onns ha la famiglia Anton Häfner surdà lur butia en novs mauns e perquai fatg in contract da fittanza cun la societad «butia Ramosch». L'avrigl ha lura Wanda Hopmann avert da nov cun grond schlantsch las portas e cun quai segirà l'avegnir la butia communala cun in spurtegl da posta ed in pitschen café.
Ma ussa è entrada la disditga davart dal possessur ed anteriur manader da la butia. Sur dals motivs da quella disditga n'ha Anton Häfner dentant betg vulì prender posiziun envers las medias.
La societad vul restar
La presidenta da la societad purtadra da la butia ha infurmà RTR ch’els veglian examinar las pussaivladads per pudair restar vinavant en quellas localitads. Els en surstads da la decisiun e n'han betg la chapientscha per quest pass be in mez on suenter l’avertura. Tenor la presidenta da la societad sa tracti qua da localitads idealas per ina butia, chattar a curta vista ina autra soluziun n'è betg pussaivel.
