La radunanza communala da Schlarigna ha approvà glindesdi saira il credit supplementar da 465'000 francs per sustegnair l’ospital regiunal a Samedan. Tut en tut ha l’ospital dumandà las 11 vischnancas purtadras per in credit supplementar da tschintg milliuns francs, cunquai che l'ospital ha l'onn passà fatg ina perdita da tschintg milliuns francs. Las vischnancas duain decider en chaussa fin la fin da zercladur 2024. Ils custs duain vegnir repartids tenor la clav da regiun 2023 (senza la vischnanca Bregaglia):
Segl | 3,71% | 185'500 francs |
Silvaplauna | 7,69% | 384'500 francs |
San Murezzan | 37,11% | 1'855'500 francs |
Schlarigna | 9,3% | 465'000 francs |
Puntraschigna | 11,26% | 563'000 francs |
Samedan | 13,1% | 655'000 francs |
Bever | 2,77% | 138'500 francs |
La Punt Chamues-ch | 4,76% | 238'000 francs |
Madulain | 0,97% | 48'500 francs |
Zuoz | 6,1% | 305'000 francs |
S-chanf | 3,23% | 161'500 francs |
Total | 100% | 5'000'000 francs |
En pli han ils da Schlarigna approvà il quint annual da l’onn passà. Quel ha serrà cun in surpli da bun quatter milliuns francs. Quai tar custs da passa 25 milliuns francs.
Ultra da quai ha la radunanza communala approvà dus credits: per l'ina 900'000 francs per lavurs da mantegniment a l'aual da Schlattain e per l'autra 220'000 francs per in nov vehichel per lavurs communalas.