Il sistem da «snowfarming» na funcziuneschia betg sco giavischà, uschia la conclusiun da la suprastanza communala da Puntraschigna. En furma da test vuleva la vischnanca conservar naiv da l’enviern passà per la duvrar questa stagiun.
Memia pauca plazza
Cumenzà aveva l’experiment mez mars cun 780 meters cubic naiv artifiziala. Las mesiraziuns mensilas hajan mussà che la naiv è luada rasantamain fin l’october. Quai malgrà plattas da stiropor ed isolaziun tras folias. Il process da luar pudess da principi vegnir ralentà marcantamain grazia ad ina vetta da resgim da 40 centimeters. Dentant dettia memia pauca plazza per conservar la naiv durant la stad.
Producir direct la naiv
Per spartir la naiv conservada durant la stad sin ils prads, sto il terren esser schelà. Grazia als chanuns da naiv moderns è ina producziun da naiv sin il lieu gist uschè effizienta. Perquai ha la suprastanza da Puntraschigna decis da sistir il project e da planisar vinavant vid l’ennavaziun da las loipas.