La revisiun totala da la constituziun communala è pronta per la votaziun dals 22 da settember. Cun ina structura moderna vuless la vischnanca ir en il futur.
Ina direcziun administrativa
Puntraschigna vul installar ina direcziun administrativa. Quai per pudair separar la suprastanza da la vischnanca dapli da la vart operativa, uschia ch'ils suprastants e las suprastantas communalas na dovran betg pli uschè bler temp per quest'incumbensa. La direcziun administrativa duai vegnir manada da la persuna ch'ha il post dal presidi da la vischnanca e consister d'ulteriuras duas persunas.
Ina suprastanza sminuida
Las incumbensas en la suprastanza duain era vegnir pli pitschnas. Uschia duai la suprastanza actuala – che cumpiglia set commembers e commembras – sa sminuir sin tschintg. Cun quests midaments spera la presidenta Nora Saratz Cazin da pudair motivar dapli glieud d'entrar en ils gremis politics da la vischnanca.
Discussiuns a la radunanza communala
A l’ultima radunanza communala ha la vischnanca preschantà la revisiun. Las differentas midadas èn vegnidas discutadas – tranter auter er il dretg communal per persunas estras. Ils votants e las votantas na vulevan betg avair quest passus en la nova constituziun, quai cun ina gronda maioritad. Perquai è quest artitgel vegnì stritgà or da la revisiun.
Co decider sur da midaments dal urden da basa
Las pli grondas discussiuns ha chaschunà la dumonda, co duai vegnir decidì en futur midaments en il plan da zonas, las leschas da fabrica, da las segundas abitaziuns, d'impostas e polizia ed il plan per l’access. La nova constituziun prevesa, che la radunanza communala dastga decider sur dals midaments. Ina gruppa da votants e votantas n’eran betg perencletg ed han inoltrà in'autra proposiziun. Quella prevesa che midaments en las chaussas duain vegnir decidids a l’urna. Il votum dals preschaints: 51 persunas eran per la varianta da la constituziun e 53 eran per l’autra varianta. 22 persunas s’han abstegnì.
Las dus variantas vegnan a l’urna
Cunquai che la decisiun da la radunanza communala da Puntraschigna era stretga, èn tuttas dus variantas sin ils cedels da votar. Uschia vegn decidì sur da la constituziun ed las dus variantas ils 22 da settember.