Da dis suleglivs, suenter ch’i ha bischà e navì, è il tschaffen d’ir dasper las pistas grond tar diversas skiunzas e skiunz. Il privel è però gist uschè grond. Per Linard Godly e sia squadra dal servetsch da salvament da l’Engiadina San Murezzan Mountains èn quels dis intensivs. La damaun baud vegnan numnadamain siglientadas lavinas, tratgas saivs a lieus periclitads ed installadas tablas per sensibilisar la glieud. Tuttina na possian ins betg evitar accidents dasper las pistas, uschia Linard Godly.
Situaziun precara
Quest onn saja la vetta da la naiv instabila, causa la pauca naiv dal december, las fradaglias ed il ferm vent. Suenter la naiv frestga dals ultims dis dettia quai glieud che tschertgia il «kick» e giaja en in grond privel e ristg cun bandunar las pistas marcadas. Tar intginas costas saja la probabladad da rivar giu salv sco tar il roulet russ, tar 50%, di Linard Godly. El e ses team fan il pussaivel per segirar las pistas dal territori da skis e la speranza ch'i na capita insatge saja adina gronda.