Per pudair quasi dublegiar la capacitad da trametter forza electrica sur la lingia d'auta tensiun, tranter Pradella e La Punt, ha la Swissgrid rinforzà ils ultims dus onns 90 da 127 pitgas per lung da quest traject. Per realisar questa lavur han ins duvrà 260'000 struvas e 5'000 tonnas atschal.
Cun il rinforzament da las pitgas, vegn meglierà marcantamain il transport da forza electrica da las Ovras idraulicas da l'Engiadina, uschia Swissgrid. Quest traject è ultra da quai d'impurtanza internaziunala per il barat d'electricitad tranter l'Austria, l'Italia e la Svizra.
Las lavurs han cumenzà l'onn 2021, la lingia è ida il 11 da november 2022 puspè en funcziun. Il project n'è betg anc serrà giu dal tut. Proxim onn survegnan las pitgas rinforzadas anc ina colur verda per s'adattar meglier a l'ambient.