La vischnanca da la Punt Chamues-ch vul er en l'avegnir sa posiziunar sco lieu per ir cun velo. La radunanza communala d'ier saira ha perquai approvà in credit da 140'000 francs per organisar ina etappa dal Tour de Suisse l'auter onn. Per la 9avla giada vegn la Punt Chamues-ch uschia ad esser l'auter zercladur lieu d'arrivada e da partenza da la cursa da velo.
Il suveran ha plinavant approvà la revisiun totala da la lescha da scola ed il reglament per il regruppament da terren. Quel è part da la quarta etappa dal project per revitalisar il flum En ed il aual da Chamuera.
