Quatter giadas ha la firma incumbensada da la Pro Flüela rumì la via dal Pass dal Flüela. Ma mintga giada haja puspè navì, uschia n’han els betg pudì avrir la via sur ils dis da festa quest onn.
La societad Pro Flüela s’engascha gia dapi onns per ina avertura dal pass. Dapi l’avertura dal tunnel dal Vereina aveva il chantun ordinà da serrar il pass, ma iniziativas e petiziuns han procurà ch'i dettia ina cunvegna. La societad Pro Flüela vegn finanziada per gronda part dal chantun, ma era da singulas vischnancas e per part era da privats.
Ina situaziun betg cuntentaivla
Tenor Riet Denoth, in dals suprastants da la societad Pro Flüela prevesan ins da far squitsch sin il chantun per chattar ina meglra soluziun per l'avegnir.
Il pass dal Flüela è impurtant per avair in’ulteriura avaina da trafic cun l'Engiadina e per pussibilitar in access en Engiadina durant 24 uras.
Tenor infurmaziuns da la Pro Flüela prevesan ins dad avrir il pass dal Flüela a partir dals 30 da december enfin ils 7 da schaner e lura a partir dal prim da matg 2024.