Il Parc Naziunal Svizzer ha publitgà sia retschertga da giasts. Quella mussa ch'ina gronda part (41%) vegn cun meds publics en il parc. Quai sajan dubel uschè bler sco anc il 2020. Quai giaschia probablamain vi da la charta da giasts che fa gratuit il traffic public en la regiun.
La retschertga mussa er che blers giasts dal parc naziunal restan plirs dis en la regiun da l'Engiadina e la Val Müstair. 60% stettian sur notg en la regiun Engiadina Bassa Val Müstair. Passa la mesadad passentan tranter 4 fin 14 notgs en la regiun.
Plinavant visitan dus terzs da las persunas dumandadas il parc gia per la segunda giada. Passa la mesadad da quellas e quels perfin per la terza giada. Adina dapli osps plascha plinavant er la laina morta. Avant 25 onns han anc bleras persunas inditgà ch'i disturbia che la laina morta giascha enturn.
