Dal 2018 aveva la Engadin St. Moritz Mountains SA retschavì il permiss per realisar ina nova e moderna pendiculara da San Murezzan en la regiun da skis Corviglia. Sinaquai avevan vischins fatg in'emprima giada recurs tar il Tribunal administrativ federal. Il settember passà ha questa dretgira però refusà il recurs, uschia ch'il project avess pudì vegnir realisà. L'interpresa planisava da realisar quel davent da la primavaira 2021.
Segunda giada recurs
Ussa han ils vischins danovamain fatg diever da lur dretg da recurrer, questa giada al Tribunal federal a Losanna. La Engadin St. Moritz Mountains SA sto ussa danovamain spustar la realisaziun. Previs è ussa l’avertura il december 2023.
La «Signalbahn» actuala datescha dal 1972 – dapi lura maina quella ils giasts en la regiun da skis Corviglia. Tenor ils possessurs sto quella vegnir remplazzada urgentamain ed uschia adattada als basegns dad ozendi.
Per tadlar curt e cumpact: