Mecatronista da pendicularas - Sina Traugott lavura là nua che auters fan vacanzas

Sina Traugott ha 17 onns e fa l’emprendissadi sco mecatronista da pendicularas sin il territori da skis Corvatsch sur Silvaplauna. La giuvna oriunda da l’Argovia ha vesì en in catalog da professiun quel mastergn ed è subit stada persvasa. Chattà ina plazza da giarsunadi ha ella tar las pendicularas Corvatsch en Engiadin’Ota. Là haja ella numnadamain gia adina fatg vacanzas cun la famiglia uschia che l’Engiadina saja in pau sco in segund da chasa. Da pudair lavurar là nua che auters fan vacanzas fetschia grond plaschair.

Lavurar en ina domena masculina

Mecatronistas da pendicularas èn responsablas ch’ils indrizs funcziunan. Pia da controllar e reveder pendicularas, sutgeras e runals directamain sin las pitgas dal territori. Là hajan ins ina vista unica che betg mintgin ha, di Sina Traugott. Sper la lavur si ad aut reparan ellas ed els er indrizs mecanics ed electrics en l’ufficina. Ina lavur multifara e corporala. L'emprendissadi datti dapi l’onn 2006 en Svizra, fin oz è il mastergn ina domena masculina. Sina Traugott ch’è en il segund onn d'emprendissadi na disturba quai betg. Anzi, ella preferescha da lavurar cun umens.

In mastergn per mintgin e mintgina

Er sch’igl è in lavur corporala che pretenda blera forza, è Mauro Margiotta, responsabel per ils emprendists e substitut dal manader tecnic a Corvatsch persvas che mintgin e mintgina vegn da far el. Numnadamain tutgan er tiers lavurs da mecanica fina. Per quellas possia quai esser in avantatg d’esser ina dunna. Per la carriera saja il mastergn sco mecatronist u mecatronista da pendicularas ina buna basa.