Il cussegl da la Fundaziun de Planta-Samedan ha tschernì Martina Shuler-Fluor sco nova manadra da gestiun. Ella è mediatura da lingua e cultura. La Zuozingra è domiciliada a Madulain. Ella surpiglia il post da Dr. Robert Grossmann che ha manà las fatschentas dapli l'atun 2012, scriva la fundaziun en ina communicaziun.
Sco la Fundaziun de Planta scriva, vegnia il center cultural da la Chesa Planta, che cumpiglia in museum, ina biblioteca, ina vasta sperta culturala e curs da rumantsch, resguardà sco in dals lieus culturals pli cumplets dal Grischun.
Martina Shuler-Fluor è creschida si en Engiadin'Ota ed è dapi in pèr onns engaschada da la Lia Rumantscha sco promotura da la lingua rumantscha en Engiadin'Ota ed en la Val Müstair. Da promover la lingua e cultura rumantscha resguardia Shuler-Fluor sco vocaziun.
Ella giavischia in barat d'ideas viv ed intensiv tranter la Chesa Planta a Samedan, ils indigens ed ils giasts sco er ina stretga collavuraziun cun las scolas communalas e medias, las vischnancas, las instituziuns culturalas, las organisaziuns da turissem e la scena culturala.
