Almain 25 onns ston ils tractors esser per ch'els pon sa numnar oldtimers. Ils Hürlimanns, Bührers e Fendts che sa scuntran durant questa fin d'emna a Madulain adempleschan questa premissa. Ils organisaturs han fatg quint cun var 75 tractors, vegnids èn lura 95 tractors – tants sco anc mai, ha Nuot Padrun ditg envers RTR. Ils pli vegls vegnan ad esser enturn 70 onns. Rivar rivan els da l'entira Engiadina e la Val Müstair, dentant era dal rest dal Grischun e perfin da l'Argovia, la Turgovia ni il Principadi da Liechtenstein. 8 tractors sajan perfin partids già il mardi davent da Berna e sajan arrivads il venderdi en Engiadina.
Il tractor en il center
Ils tractors oldtimers vegnan mussads en sonda vers saira ed en dumengia a Madulain. Tuts dus dis èn previs era girs. En sonda davent da Cinuos-chel a Madulain cun in latsch en Val Susauna ed a Prasüras. En dumengia è previs in cortegi davent da Madulain a Zuoz ed enavos. Al concert en sonda saira spetgan ils organisaturs var 150-200 persunas, per la dumengia anc ina giada 100-150.
L'inscunter vegn organisà da la societad Almatrak Engiadina. Almatrak stà per «Alte Maschinen und Traktoren». Mintga dus onns ha lieu l'inscunter da tractors vegls en La Plaiv, ils onns tranteren sa scuntran ils amaturs da tractors vegls a Filisur a la festa da vischnanca cun inscunter da maschinas agriculas veglias.