Dapi quatter mais vala per las studentas ed ils students dal Lyceum Alpinum a Zuoz in nov mintgadi. Numnadamain han tuttas e tuts da dar giu la bunura lur telefonins, suenter las lecziuns il suentermezdi survegnan els puspè lur handys.
Facit positiv
Il facit dal rectur, Oliver Hartwright, è trasora positiv. Il pli superbi saja el, ch’el vesia sin l’areal da scola scolaras e scolars che communitgeschan directamain in cun l’auter. Quel svilup al fetschia grond plaschair. Er en las lecziuns sa haja meglierada la situaziun a reguard la concentraziun e la distracziun. Suenter quatter mais, è il rectur pia persvas da trair vinavant la nova regulaziun a reguard telefonins. Er las scolaras ed ils scolars, badan in svilup. Lur prestaziun saja vegnida meglra dapi ch’els han da dar giu ils telefonins.