Las reservaziuns d'abitaziuns da vacanzas d’enviern han per part gì da vegnir annulladas u spustadas sin pli tard. La raschun è il scumond actual dal Cussegl federal da sa radunar en dapli che tschintg persunas.
![Martina Hänzi](https://www.rtr.ch/static/cms/images/960w/2ae949e.jpg)
Ils giasts èn flexibels: tut tenor vegn la nona in’emna ed il non l’autra cun la famiglia en vacanzas en Engiadina.
Actualmain hajan ils fittaders dad abitaziuns da vacanzas simplamain dad esser fitg culants e tut tenor er desister d’entradas che fissan atgnamain garantidas.
Nus sco fittaders d’abitaziuns n’avain en quest cas da corona nagina segiranza che paja a nus la perdita.
![Claudia Pfister](https://www.rtr.ch/static/cms/images/960w/0debdc.jpg)
La dumonda sche la decisiun dal Cussegl federal correspundia a la uschenumnada pussanza superiura u betg, na saja betg anc sclerida, uschia Martina Hänzi. Perquai vegnia mintga singul cas valità separadamain.
Tut sin l’ultim zac
Per las reservaziuns annulladas chattian ins relativ svelt novs giasts, la dumonda saja fitg gronda per abitaziuns durant las vacanzas da sport, suttastritga Claudia Pfister. Dentant reservian ils giasts a fitg curta vista.
Ils restaurants mancan
Sper in augment tar la lavur d’administraziun causa tut las prescripziuns en connex cun corona, saja la dumonda che vegnia fatga il pli savens, sche la cuschina saja equipada bain avunda. Empè dad ir la saira en ustaria, han ils giasts numnadamain da preparar e cuschinar a chasa lur tschaina. Almain fin la fin da favrer.