L’onn 1992 è il Tour de Suisse arrivà per l’emprima giada a La Punt Chamues-ch. Quest onn arriva l'occurrenza gia per la 9avla giada en la vischnanca al pè dal pass da l’Alvra. L’organisaziun saja pia gia quasi ina tscherta rutina, di Damian Gianola, commember dal comité d’organisaziun.
L’etappa roiala dal Tour de Suisse 2023 maina ils 15 da zercladur sur 211 kilometers da Fiesch fin a La Punt Chamues-ch. Là partan ils var 170 curridurs ils 16 da zercladur vers Oberwil-Lieli en il Chantun Argovia.
Sustegn da l’entira regiun
Il Tour de Suisse saja in eveniment impurtant per l’entira regiun. Numnadamain vegnan emess dapertut ils purtrets dal lieu en televisiun. Uschia saja er il sustegn da l’entira Engiadin’Ota fitg grond, uschia Damian Gianola. Saja quai il sustegn finanzial per ils custs totals da var 240’000 francs, ma er per il sustegn da persunal haja ina collavuraziun cun diversas vischnancas en la regiun. Vinavant gidian var 100 gidantras e gidanters per realisar l’eveniment.
Esser pronts per eventualitads
In factur central per eveniments sut tschiel liber è l’aura. Da bell’aura enfin tar naiv stoppian ins pia far quint cun tut. Impurtant tenor Damian Gianola saja d’esser pront e flexibel, per il cas ch’i dettia midadas. Cun in egl guardian ins quest onn natiralmain er sin Brinzauls. Duess numnadamain ir en vigur la fasa blaua, na fissi betg pussaivel d’ir sur il pass da l’Alvra. Plan B fiss la ruta sur il pass dal Güglia. Quai decidia però l’organisaziun sportiva. Ils responsabels da La Punt Chamues-ch hajan simplamain d’esser pronts per tut las eventualitads.
Durant dus dis vegn La Punt ad esser il Mecca dal sport da ciclissem
Il principi dals onns novanta han in pèr entusiasts dal sport da ciclissem sa mess ensemen è decidì dad empruvar dad organisar a La Punt l’arrivada dad in'etappa dal Tour de Suisse. Il Club 92 Engiadina ha davent da l’entschatta sentì blera simpatia ed uschia è l’idea creschida ad in success. Dapi ils onns 90 è il pli grond eveniment da sport da la Svizra adina puspè a La Punt. Il lieu en Engiadin'Ota ha pudì sa posiziunar sco lieu da ciclissem.
Blera lavur, dentant er blera rutina
Ina da las grondas sfidas organisatoricas per ils responsabels da La Punt è il fatg che la cursa è daventada adina pli gronda, e ch'il spazi a La Punt sez vegn adina pli stgars. Là nua ch'ins pudeva pli baud anc parcar autos e nua ch'ins aveva anc plazza per tut il truscha dal Tour de Suisse, stattan uss chasas. Uschia ch'il plaz è anc pli limità ceh quai ch’el era gia.
In'ulteriura sfida èn sa chapescha tut las pretaisas che l’organisaziun da la cursa fa al lieu d’etappa. La Punt ha per exempel survegnì ordinaturs plain pretaisas pertutgant la segirezza. Qua ha ins da resguardas ina massa. Il lieu en Engiadin'Ota è dentant sin buna via. Ralf Fluor, il responsabel per l’infrastructura al lieu è da buna speranza.