Il 2019 è vegnida inoltrada ina iniziativa a Zernez. Passa 100 abitantas ed abitants han suttascrit quella. L'iniziativa pretenda ina suprastanza ed in cussegl da scola legitimà democratic. En avegnir duessan ils candidads pia vegnir elegids independent da la fracziun, nua ch’els abitan. La constituziun communala actuala pretenda numnadamain, che mintga fracziun sto esser represchentada cun in commember en la suprastanza.
La vischnanca va in pass enavant
Ultra da questa iniziativa propona il cussegl communal er, ch'ins chatta en l'avegnir sco emprim candidatas e candidats per la suprastanza communala, avant che organisar in segund scrutini. Pir cura ch'ils candidats e las candidatas èn enconuschents, duai pia vegnir organisà il segund scrutini, nua che la maioritad relativa vala.
Uschia possian ins evitar che singuls commembers dals gremis politics vegnian elegids cun mo ina vusch – sco quai era capità il 2018, argumentescha il cussegl communal.
