Tenor l’Uffizi federal da l’ambient saja il stadi da la biodiversitad en Svizra insuffizienta. In terz da las spezias è en privel da svanir. Il motiv principal saja ch'ils spazis da vita svaneschan u che la qualitad da quels daventa pli e pli nausch. Quai ha er influenzas sin ils baus-glisch, ils vermins da glüm.
En Svizra datti quatter sorts da bau-glisch. Ina sort è il bau-glisch talian (luciola italica) e quella è fitg rara. En Grischun devi avant radund 20 onns, tenor la info fauna, anc trais lieus en Grischun cun quest bau-glisch specific, en la Bregiaglia, en il Puschlav ed en la Val Müstair. La info fauna è il center naziunal svizzer da datas ed infurmaziuns da fauna.
Sin dumonda da RTR en quellas regiuns, n'ha nagin pudì confermar l’existenza dal bau-glisch talian. En la Val Müstair han singulas persunas pudì raquintar nua che els regordan d’avair vesì pli baud tals baus. Uschia èsi stà pussibel da filmar e cumprovar l’existenza da singuls baus-glisch talians en la Val Müstair.
Il bau-glisch talian glischa en notgs chaudas en il mais da fanadur (tut tenor aura e clima). La femna sesa e glischa per terra e sin erva, il mastgel sgola ed è activs fin enturn mesanotg.
Or da l'archiv