Dapi la dumengia passada era in urs vegnì observà en plirs lieus en l’Engiadina Bassa. L’animal viandava sur Strada, Tschlin, Seraplana, Sent, Ftan, Susch e Zernez ed era vegnì observà il venderdi da la surveglianza da chatscha.
L’urs disgrazià è in animal giuven masculin da 110 kilograms. Il cadaver vegn surdà a l’Universitad da Berna per ulteriuras examinaziuns. Da tge animal ch’i sa tracta vegnian examinaziuns geneticas a mussar, scriva l’uffizi.
Quai succedia deplorablamain mintgatant ch’in animal selvadi sa chattia sin ils binaris, di Yvonne Dünser, pledadra da medias da la Viafier retica.
Il locomotivist n’ha nagina schanza da vesair ils animals sch’igl è stgir. Saja quai uss in urs da 110 kilograms ubain in tschierv che paisa er enturn 100 kilos.
Suenter l’accident cun l’urs haja la viafier telefonà al guardiaselvaschina ed il tren haja pudì cuntinuar ses curs cun 10 minutas retard. Quantas persunas che sa chattavan en il tren na saveva Dünser betg dir, ella suppona dentant tranter 15 e 20 persunas.
L’ultim tren sin il tschancun chaschunia blers accidents, di Guolf Denoth, il schef da surveglianza da chatscha dal district Engiadina Bassa.
Georg Brosi, l'inspectur da chatscha e pestga dal chantun Grischun, ha dà scleriment davart dus puncts.
- Primo: L'urs saja activ durant la notg, ed ils binaris porschian la pussaivladad da viagiar pli svelt, cunquai ch'i na dat nagins obstachels sin quels.
- Secundo: L'examinaziun genetica a Berna saja necessaria per sclerir la derivanza da l'animal. Plinavant servia l'examinaziun er a la discussiun scientifica, uschia Brosi.
Dumondas a Georg Brosi
Gia il 2012 aveva quai dà in accident da tren cun in urs, lura a Scuol. L'urs M13 aveva survivì la collisiun.
RR novitads 12:00 / 14:00
L'urs filmà cun camera da surveglianza
Ina contribuziun da Schweiz Aktuell da SRF:
