Ils dis da festa èn stads intensivs, er per il servetsch da salvament. La Rega ha numnadamain gì in quart dapli sgols da salvament che l’onn avant en Svizra. Er en las regiuns turisticas sco l’Engiadina è la Rega stada savens en acziun. Per las instituziuns medicinalas è quai allegraivel. Numnadamain profitan ils ospitals dals accidents da giasts.
Mantegniment da spiertas
Var 35% dals pazients da l'ospital regiunal da l’Engiadina Bassa èn durant la stagiun auta giasts. Tenor il directur e schefmedi da l’anestesia, Joachim Koppenberg, èn quels pazients ina part impurtanta per mantegnair spiertas sco il tomograf computerisà CT u er il tomograf da resonanza magnetica, MRT. Era per la Clinica Gut a San Murezzan èn ils pazients esters impurtants per lur spierta. Senza quels, na pudess la Clinica numnadamain betg porscher sia spierta da fitg auta qualitad.
