-
Bild 1 von 6Legenda: Sara-Bigna Janett en acziun sco fantschella Adele. RTR, G. G. Flepp -
Bild 2 von 6Legenda: Sara-Bigna Janett en in’ulteriura scena. RTR, G. G. Flepp
-
Bild 3 von 6Legenda: Sara-Bigna Janett avant la funtauna amez la curt dal chastè da Haldenstein. RTR, G. G. Flepp
-
Bild 4 von 6Legenda: Sautunzs e sautunzas en plaina acziun sin la tribuna a Haldenstein. RTR, G. G. Flepp
-
Bild 5 von 6Legenda: Tranteren èsi da discutar e far midadas vi da scenas. RTR, G. G. Flepp
-
Bild 6 von 6Legenda: Era ils mastergnants han da far lavurs da preparaziun. RTR, G. G. Flepp
Per Sara-Bigna Janett eri dapi ina visita en l'opera da Turitg en la vegliadetgna da 6 onns cler, ch'ella veglia daventar chantadura d'opera. In avantatg è stà che ses bab Jachen Janett, ch'è in enconuschent musicist e dirigent da l'Engiadina, ha sustegnì sia feglia. Ma il mund d'operas n'è tuttavia betg uschè glamurus e bels sco quai che Sara-Bigna Janett aveva s'imaginà el da lezzas uras sco buoba en l'opera da Turitg.
Betg uschè simpel
"Igl è blera lavur, igl è bleras giadas ch'ins na survegn betg lavur e bleras giadas ch'ins dubitescha sa sez...". Sco chantadura giuvna sto Sara-Bigna Janett adina puspè chantar avant e sa participar a concurrenzas, e magari er lavurar sco camariera per gudagnar insatge tiers. Er tar l'operetta da Haldenstein n'avess Janett betg quintà ch'ella survegnia la rolla. Uss dentant è ella fitg cuntenta, tant cun il chant sco cun il caracter.
Ina rolla sumeglianta a la realitad
Janett gioga ina fantschella che vul per vita e mort far carriera sco actura. Ma quai era grev da lezs temps (enturn 1850), cunzunt sco fantschella. Ina rolla cun tschertas parallelas tar la vaira Sara-Bigna Janett, che vul er far carriera sco chantadura d'opera ch'è era in zic actura. Fin uss fa ella quai cun success, er sch'i na tanscha betg anc da viver mo da la musica.