Engiadina - San Murezzan vul distgargiar il traffic cun nova rundella
La rundella duai vegnir construida a Dim Lej, al cumenzament da San Murezzan datiers dal nov areal da la staziun. Il cussegl communal ha perquai approvà in credit dad 1,68 milliuns francs.
La finamira è da distgargiar la situaziun da traffic sin l'areal da la staziun da la viafier e la plazza dals bus. L'ultim pled ha però il pievel e quai ils 19 da matg a l'urna.
Cunvegna da prestaziun per halla da glatsch
Il cussegl communal ha plinavant approvà la cunvegna da prestaziun per construir il nov center da sport da glatsch en l'Engiadin'Ota. La cumpart da San Murezzan munta a 100’890 francs. Il lieu nua che la halla da glatsch vegn realisada n'è anc betg cler.
