Ina cumissiun aveva examinà dapil il 2014 l'urden da guaud existent. La cumissiun è stada da l'avis che l'urden da guaud vegnia per gronda part gia reglà tras ina lescha superiura dal chantun. Uschia na saja ina lescha betg necessaria ed ils puncts che na sajan betg anc reglads possian era vegnir fixads en in reglament. La radunanza ha percunter refusà da desister d'ina lescha e vul laschar surlavurar quella da la cumissiun responsabla.
La radunanza communala n'entra er betg sin la nova lescha da cultira, pastgira ed alps. Er quella lescha duai vegnir surlavurada anc ina giada e vegnir uschia simplifitgada.
Lescha da charrar sin vias da guaud
Ed er en la revisiun da la lescha per charrar sin vias da guaud na vul la radunanza communala betg entrar. L'urden existent duai valair er en futur. Igl era vegnì inoltrà reclamaziuns pervi dal diever da las vias, ma tenor la radunanza saja la cumissiun responsabla abla da resguardar giavischs da la populaziun er cun la lescha existenta.
Segunda etappa per provediment d'aua
La radunanza communala ha dentant decidì da realisar la segunda etappa per amplifitgar ils indrizs dal provediment da l'aua. Per questas lavurs han ils preschents concedì il credit necessari da 800'000 francs. Suenter Pasca duai vegnir cumenzà a bajegiar.
Plinavant ha il suveran acceptà il barat da terren cun il chantun per pudair construir la via chantunala.
RR novitads 06:00