Dapi l'onn 2001 vegn discurrì da quest project. Il resultat dals plans – ina serenera regiunala per ils nov cumins da San Murezzan enfin a S-chanf cun custs da construcziun da passa 76,5 milliuns francs.
Las trais sereneras existentas ARA Sax, ARA Staz ed ARA Furnatsch èn vegnidas fabritgadas durant ils onns 1970/80. Ils standards na correspundan betg pli a las pretaisas ed a las leschas dad oz.
La nova serenera a S-chanf è ina collavuraziun da nov cumins. La soluziun regiunala d’ina unica serenera per ils abitants tranter San Murezzan e S-chanf, è dad ina vart pli ecologica. Ma era cun ils custs da gestiun da 6,13 milliuns francs è questa soluziun pli economica che da sanar e cuntinuar cun las trais sereneras existentas.
Modular e flexibel
Il concept da la nova serenera ARO prevesa parts flexiblas, nua ch’ins pudess engrondir l’implant cun singuls moduls. Concepida è la serenera regiunala per 75’000 abitants.
In grond plazzal da fabrica
En tut vegn duvrà durant ils proxims dus onns bler material per il nov implant regiunal. Numnadamain:
- 3’100 tonnas atschal d’armadira
- 27’000 meters cubics betun
- 3 cranas
- passa 30 lavurers
Las lavurs proseguan tut tenor plan, quai tenor Godi Blaser, manader da project ARO.
-
Bild 1 von 3Legenda: 4 plauns e 16'000 meters quadrat surfatscha RTR/U. Morell -
Bild 2 von 3Legenda: Las lavurs han entschiet in favrer dal 2017 RTR/U. Morell
-
Bild 3 von 3Legenda: 4 firmas da construcziun collavuran Passa 30 persunas lavuran sin il plazzal da construcziun. En tut vegn elavurà 3100 tonnas fier, 27 000 meters cubic betun e trais cranas èn staziunads sin il plazzal da construcziun. RTR/U. Morell
Telesguard 17:40