La regenza grischuna approvescha be per part la revisiun parziala da la planisaziun locala da la vischnanca da Silvaplauna. La revisiun ha sco finamira da translocar in manaschi cun chavals a Champfèr. La regenza va d'accord cun l'intent da definir ina parcella da 2,2 hectaras sco zona per sport da chavals. Fin ussa era quella parcella terren agricul. Uschia po translocar il manaschi cun chavals ch'è oz posiziunà en la zona d'abitar.
Project per ina halla d'ir a chaval sto anc vegnir adattà
Percunter na va la regenza grischuna betg d'accord cun il plan da furmaziun per il nov manaschi cun chavals. La vischnanca da Silvaplauna stoppia anc ina giada repassar il plan. La regenza pretenda da redimensiunar ils fabricats planisads, ma era la surfatscha dals claus per ils chavals.
RR novitads 18:00