![Hotel Fontana a Schlarigna](https://www.rtr.ch/static/cms/images/960w/79790e.jpg)
La parcella che sa chatta en il quartier da Provuler a Schlarigna, duess vegnir transmidada da la zona agricula en ina zona da fabrica. Per far quai vuli il consentiment da la populaziun.
Per finanziar il project da bun 20 milliuns francs, prevesa la famiglia tessinaisa Fontana, che posseda la parcella a Schlarigna, da realisar sper l’hotel er trais abitaziuns secundaras en il project.
Cussegl communal beneventa project
Sco che la suprastanza communala da Schlarigna scriva en la missiva, haja ella grond interess vi d’in nov hotel en vischnanca. Ils ultims onns han differents hotels gì da serrar las portas ed èn vegnids transmidads en abitaziuns secundaras.
Schlarignots han gia sbittà plirs projects
Dus projects per novs hotels a Schlarigna n’ha la populaziun betg acceptà ils ultims onns:
- il project da las pendicularas Engiadina San Murezzan Mountains cun il cristal da Mario Botta
- il project Punt Schlattain per in nov hotel da la Suvrettahouse SA entamez vischnanca cun in passagi sutterran
Ina nova gestiun d’hotel en il sectur da trais stailas, fiss bainvesida en vischnanca e gidass er ad augmentar las frequenzas da giasts a Schlarigna. Previs saja in hotel cun in concept fitg modern, ha declerà l’advocat Galfetti, che represchenta la famiglia Fontana.
Er pendicularas èn vid in nov project
Sin l’areal dal parcadi Marguns da las pendicularas, saja la societad er vid in nov project da surfabricaziun, ha tradì il suprastant communal da Schlarigna, Riet Ganzoni. Davart las dimensiuns e termins concrets na poss ins dentant anc dir nagut.
Decider al medem mument
Per ch’ils votants sajan infurmads en detagl davart il project da l’Hotel Fontana a Schlarigna, orientescha la suprastanza en ina radunanza ils 12 da settember 2016. Pussaivel saja, uschè Ganzoni, ch’il project vegnia ensemen cun in nov project da las pendicularas Engiadina San Murezzan Mountains gia proxim onn davant radunanza communala.