La Emmi, che è la pli gronda elavuratura da latg en Svizra, surpiglia ina gronda part dal chaschiel che vegn producì en la Val Müstair. La producziun dal december e dal schaner ha ella ussa refusà. Quai sa tracta da radund 17 tonnas.
Il motiv sajan bacterias d’acid da paintg
La concentraziun da quellas bacterias saja tenor Emmi massa auta. Tras quai daventian las foras en il chaschiel massa grondas ed il gust na saja pli il gust giavischà.
Tenor il president da la Chascharia Val Müstair Gian Bott saja zunt clar danunder che las bacterias derivian. Il problem saja il pavel da silo. Probablamain haja in pur pavlà ina balla da silo che n'era betg buna. Da tge pur ch'i sa tracta è grev d’eruir. Dals 15 purs che furneschan latg a la chascharia pavlan radund la mesadad silo.
Ina soluziun radicala è en vista
Per evitar problems cun bacterias dal silo dovra la chascharia dapi blers onns ina bactofuga. Quai è ina sort centrifuga che allontanescha las bacterias. Questa giada era la concentraziun da bacterias probablamain massa auta.
En l’avegnir na duess pli capitar quest problem. Gia avant pli che 5 onns han decis ils purs da la Val Müstair da chalar l'avust 2017 cun pavel da silo.
-
Bild 1 von 4Legenda: Tschaler da chaschiel Betg tut il chaschiel ha massa bleras bacterias. Armon Schlegel -
Bild 2 von 4Legenda: Chaschiel da qualitad Il chaschiel da Müstair ha gudagnà pliras medaglias. Armon Schlegel
-
Bild 3 von 4Legenda: Chaschiel da la Val Müstair Il sortiment da chaschiel è fitg varià. Armon Schlegel
-
Bild 4 von 4Legenda: La bactofuga Ina maschina per allontanar las bacterias en il latg. Armon Schlegel