La presidenta communala Claudia Troncana ha spetgà in auter resultat. La dischillusiun saja qua, i valia dentant sco adina d’acceptar la decisiun, di Troncana. Ella tema unic per il futur da la vischnanca, surtut quai che pertutga la hotellaria. Silvaplauna ha pers ils davos onns 9 hotels. Las entradas da la taglia fissan vegnidas duvradas per sustegnair quest sectur.
Anc nagin augment da la taxa da cura
Er il cumpromiss, dal qual i è vegni discurrì avant la radunanza da mesemna saira è betg daventà realitad. Bain ha la radunanza decidì d’augmentar la taxa, ma betg anc per l'onn 2017. Ins vul l'emprim spetgar sin il preventiv per savair co ch'i stettia cun las finanzas. Ultra da quai pudessi era qua puspè dar discussiuns animadas. Ils adversaris da la taglia per 2. abitaziuns èn numnadamain era cunter in augment maximal proponì da la suprastanza. Tenor quest pajass insatgi che posseda in'abitaziun da 1.5 stanzas da nov 400 empe da 200 francs l'onn.
Regenza accepta l'autonomia communala
La regenaza grischuna na vul betg commentar la decisiun da Silvaplauna. Quai saja plainamain ina chaussa da l'autonomia communala ha ditg il cusseglier guvernativ Jon Domenic Parolini envers RTR. Per la regenza na saja questa decisiun era betg ina decisiun cun valur da signal. Mintga vischnanca stoppia chattar ina soluziun per sasez per finanziar l'infrastructura turistica ha ditg Parolini.