Hotels da luxus datti avunda en Engiadin’Ota. Quai che manca è in hotel cun ina spierta unica, cun la pussaivladad da retrair precis quella purschida giavischada, uschia Luis Wieser, giurist e president dal cussegl administrativ da la «Engadin St. Moritz Mountains». Tut dess funcziunar digital, dal «check in» sur la pustaziun dal drink a la bar, avrir la porta cun il telefonin e bler auter pli.
Partenaris dal hotel innovativ
Dus partenaris èn da la partida per realisar quest project che vegn a custar radund 22 milliuns francs. Dad ina vart è quai Luis Wieser cun ses partenaris la firma Stricker Architects e la firma Seiler SA, da l'autra vart la Belvedere Hotels Scuol cun ils dus frars Werner e Kurt Baumgartner.
Nagina participaziun davart da las pendicularas
Per las Pendicularas «Engadin St. Moritz Mountains» han las construcziuns sin la muntogna prioritad, betg ils hotels en la val.