Millis e millis da bostgs da maila bain exact en lingia sco tar il militar – uschia sa preschenta il Tirol dal Sid. Dapi onns gia lavuran ils purs da quella regiun cun pesticids per cumbatter insects. Ina chaussa dispitaivla, ed i pudess durar anc onns enfin che la politica chatta ina soluziun.
Ultimamain ha il «Umweltinstitut München» fatg controllas per vesair quant influenza dal vent, respectiv quant che quel transporta ils tissis. Il resultat: ils pesticids vegnan transportads divers kilometers enfin amez ils vitgs, resumescha il president communal da Mals.
Quant ferma è pertutgada la Val Müstair
L’Uffizi per la natira e l'ambient dal Chantun Grischun vul evaluar quest resultats. Els han montà in’apparatura speziala che fa las mesiraziuns da l'aria. Ils da la Val Müstair, oravant tut ils purs biologics ma era il parc da natira Biosfera Val Müstair èn fitg interessads dals resultats che vegnan publitgads il pli baud en in onn.
RR actualitad 17:00