En las hallas dal Lyceum Alpinum Zuoz han las scolaras ed ils scolars preschentà lur lavurs sur dal tema clima. Quai en occasiun da l'emprim «Future Planet Forum». Dasper las lavurs da la scola han scienziads e represchentants da l'economia referì davart las schanzas e consequenzas dal stgaudament climatic.
Art, scienza e fatschenta
Ils fotografs Dawna Mueller e Hitsch Rogantini han preschentà lur fotografias da las muntognas Svizras, ma era da l’Arctica e da l’Antarctica. Il stgaudament climatic mida la natira pli spert che previs. Cun lur fotografias documenteschan els quels midaments.
En differents referats ha Konrad Steffen, il directur da l'Institut federal per la perscrutaziun da guaud, naiv e cuntrada (WSL) preschentà las consequenzas dal clima a l'exempel da la perdita da glatsch en Grönlanda. Anik Kohli da la firma Infras da Turitg ha explitgà las schanzas ed ils ristgs da la midada dal clima.
Ord la vista d’ina fatschenta ha Kurt Bobst, CEO da la Repower infurmà sur da las sfidas futuras areguard la realisaziun d’energia regenerabla.
RR actualitad 07:00