Cun l’elecziun da Christian Jenny en l’uffizi da president communal per ils proxims quatter onns, han era numerus votants da San Murezzan dà lur vusch al candidat senza partida. Quels speran ch’i dat in midament e nov schlantsch en tut l’apparatura politica da San Murezzan.
Suenter ch’igl è cler che Sigi Asprion ha da surdar la batgetta la fin da l’onn a Christian Jenny, èn era s'exprimidas persunas ch’avessan pli gugent lavurà vinavant ensemen cun il president en uffizi. Uschia per exempel il commember dal parlament da San Murezzan, Mario Salis (PPS).
Uss duai el mussar ed accumplir quai ch’el ha empermess.
Salis è pront da collavurar er cun il nov elegì e sa lascha gugent surprender – en il senn positiv, sco el ha ditg.
Impurtant saja uss er, uschia ha suttastritgà il vicepresident da San Murezzan Michael Pfäffli, ch’il nov president communal arrivia da prender cun sai il schlantsch e nov vent ch’i ha dà cun sia candidatura.
Accumplir empermischuns
Sco il president communal partent Sigi Asprion ha declerà curt suenter sia sconfitta, speresch'el uss che Jenny arriva da puspè unir la vischnanca ch'è sa separada durant il cumbat electoral. Ed Asprion giavischa che ses cuntracandidat vegnia er ad accumplir quai ch’el ha empermess als votants ed a las votantas las davosas emnas.
Halla da glatsch
Cuntent che Christian Jenny ha fatg la cursa en il cumbat electoral è Roberto Clavadätscher, il president dal Club da hockey da San Murezzan. Ch’ins spereschia ferm che Jenny accumpleschia uss er l’empermischun da s’engaschar per ina halla da glatsch, sche pussaivel perfin a San Murezzan sez.
Uss cumenza l’exercizi liber
Peter Berry, votant da San Murezzan, ha congualà l’uffizi che Christian Jenny surpiglia proxim onn cun in pass sin il glatsch.
El sa gia ballar, ma per sa tegnair en pe sin il parchet da glatsch dovra Jenny uss almain dus ch’al tegnan.
Era per la destinaziun turistica Engiadina San Murezzan gioga ina rolla tge ch’i capita cun San Murezzan, ha suttastritgà il CEO Gerhard Walter. El spereschia che la buna collavuraziun ed il tempo cuntinueschian uschia, sco ch’i saja gia sa sviluppà ils davos 18 mais, anc sut la batgetta da Sigi Asprion.
-
Bild 1 von 7Legenda: Christian Jenny e Sigi Asprion curt suenter l'elecziun dal president per ils proxims quatter onns. RTR, Armon Schlegel -
Bild 2 von 7Legenda: Mario Salis, il cusseglier communal da la PPS San Murezzan. RTR, Armon Schlegel
-
Bild 3 von 7Legenda: Il CEO da la destinaziun Engiadina San Murezzan, Gerhard Walter. RTR, Armon Schlegel
-
Bild 4 von 7Legenda: Roberto Clavadätscher, il president dal EHC San Murezzan. RTR, Armon Schlegel
-
Bild 5 von 7Legenda: Battesta Albin da Puntraschigna ha dà support a la candidatura da Jenny. RTR, Armon Schlegel
-
Bild 6 von 7Legenda: Peter Berry da San Murezzan ha sustegnì activamain la candidatura da Jenny. RTR, Armon Schlegel
-
Bild 7 von 7Legenda: Il president partent Sigi Asprion gratulescha a Christian Jenny. RTR, Armon Schlegel
Impurtant'elecziun da la suprastanza
Il suveran da San Murezzan ha elegì en il segund scrutin Christian Jenny sco president communal per la perioda d’uffizi 2019-2022. Decisiv per il nov elegì vegn ad esser cun tgi ch’el sesa en la suprastanza ils proxims quatter onns. L’elecziun da l’executiva – en tut quatter sezs – è la dumengia ils 14 d'october.
RR actualitad 17:00