Durant quatter dis stat Zernez sut l’ensaina da goa. Numnadamain ha lieu per la 14avla giada il festival «Burning Mountain» . Las entradas al festival èn per l’emprima giada limitadas – e dapi plirs mais è il festival vendì ora. 6’000 fans d’electro e goa s’inscuntran sin l’areal a l’ur da Zernez. Ed er sche la musica tuna quasi l’entira notg or da las boxas, dovran las visitadras ed ils visitaders tranteren in pau sien.
Hotellaria profita
Il campadi a Zernez è plain durant la fin d’emna dal festival. Il campadi saja schizunt vegnì engrondì per var 30 plazzas, uschia il schef Andris Filli. Ed er ils hotels e las abitaziuns da vacanzas a Zernez e conturn sajan plains, inditgescha la vischnanca. E perfin l’hotel da luxus In Lain a Brail senta las consequenzas dal «Burning Mountain», sco l’hotelier Dario Cadonau di.
Tar nus arrivan ils giasts dal «Burning Mountain» cun il Ferrari.
Il festival d’electro e goa che ha lieu dals 27 enfin ils 30 da zercladur fascinescha ed attira glieud da tut ils geners.
