Ils abitants da Zernez e da Livigno pon passar dapi decennis gratuitamain tras il tunnel da Munt La Schera. Quai tenor ina cunvegna cun la possessura da la via da colliaziun, las Ouvras Electricas d’Engiadina.
Mintga passagi vegn registrà
A partir dal 1. da zercladur 2015 dovran ils abitants sper il document che conferma ch’els èn indigens, er in code da stritgs, il barcode. Quel vegn registrà mintga giada che l’indigen passa l’incasso dal tunnel a Punt dal Gal.
Meglra controlla dal dumber da passagis
Quest midament hajan las Ouvras Electricas d’Engiadina introducì or da 2 raschuns, ha declerà il vicedirectur Roland Andri. Dad ina vart possian els uschia far giu meglier quint a reguard la taxa da plivalur, da l’autra dettia cun il nov sistem er ina controlla davart il numer dals viadis gratuits. Actualmain cumpiglian ils viadis dals indigens da Zernez e Livigno 16% dals radund 300’000 passagis l’onn.