Ils ultims dus onns ha Bernhard Aeschbacher manà la TESSVM sco co-directur ensemen cun Claudio Daguati. Sco che la destinaziun cuminaivla da l'Engiadina Bassa e Val Müstair communitgescha, mida Daguati uss la plazza. En sia sesida al principi dal fanadur ha il cussegl da fundaziun perquai decis da surdar a Bernhard Aeschbacher sulet il timun dal destinaziun. Suenter la dunsaina d'onns ch'el lavura per la destinaziun conuschia el bain las regiuns partenarias.
La TESSVM sa deditgescha ils proxims onns er a la digitalisaziun. En il focus stat la purschida digitala per il giast avant, durant e suenter il viadi. «Natiralmain resta era il contact persunal cun noss giasts ina purschida che differenziescha nus dad autras destinaziuns», scriva la destinaziun. La presidenta dal cussegl administrativ da la TESSVM, Gabriella Binkert Becchetti s'allegra sin la collavuraziun cun Aeschbacher e sin las sfidas che spetgan.
La strategia da la TESSVM è vegnida reelavurada ed è uss en la fasa da la consultaziun.
La strategia saja ina basa grondiusa per posiziunar cun success la destinaziun e resguardia cumplainamain l'Agenda 2030 da la Regiun Engiadina Bassa/Val Müstair. La visiun en la strategia è: «Sco TESSVM vivain e promovain nus in turissem responsabel e persistent che porscha experientschas nunspetgadas a noss osps e respecta a medem temp ils basegns da l'ambient e da la cuminanza locala.»
