Durant 20 onns han divers medis e medias da l'Ospital regiunal a Scuol surpiglià voluntarmain ils servetschs d’urgenza per l’emprim agid. Uss è quest servetsch vegni professiunalisà. Ils medis da chasa han vinavant las incumbensas dal servetsch d'urgenza da medis da chasa e restan persunas da contact per cas betg urgents.
Trais novs medis per il cas d’urgenza
Cun quest midament duai la cuvrida surtut la notg e las fins d’emna sa meglierar. Quai tenor Joachim Koppenberg, manader da gestiun dal Center da sanadad Engiadina Bassa. Per pudair porscher questa cuvrida da 24 uras, set dis l'emna e 365 dis per onn, han ins stuì avair trais plazzas da medis dapli ed era in servetsch da turnus en pli per l’agid d’urgenza. Quest turnus supplementar vegn finanzià dal chantun Grischun.
Sper ils trais novs medis ha il servetsch d'urgenza era survegnì in nov vehichel e dapi mez da l'onn hai permanent in sanitari da salvament al post d'ambulanza Samignun.
Cuvrir era sur cunfin
Ina cunvegna cun l’Austria prevesa d'era cuvrir il servetsch d’urgenza d'emprim agid per la regiun da Nauders gist davos il cunfin. Quai perquai ch'il stadi austriac planisescha gronds projects da sanaziun vi da las vias. Il temp da viadi da Scuol en l'Engiadina Bassa fin a Nauders en il Tirol cuzza bundant 20 minutas. Entras questa cunvegna pon era ils pazients vegnir tractads en l'ospital a Scuol.