Sch’ins na faschess betg insatge cunter, lura creschissan las palids en. Quai che fiss ina catastrofa per tut quels animals che dovran palids per surviver.
Dentant co cultiveschan ins ina palì, senza duvrar maschinas: pertge cun quellas vegniss il terrain destruì. La soluziun è en sasez simpla: ins metta ora aucas. Ellas èn idealas per la cultivaziun, cunquai ch’ellas n’han betg pes, mabain alettas. Uschia na ruinan ellas betg la palì. Plinavant maglian ellas circa tut las plantinas ed ervas.
Project da pilot
Sin questa soluziun è vegnida la Pro Natura Grischun. Pervi da quai ha la Pro Natura lantschà avant stgars 3 onns in project da pilot. Quel ha persvas. Dapi lura nettegian las aucas mintg’onn ina palì a Samedan. L’enviern passentan ellas però en regiuns pli chaudas, cunquai che l'aua schela en l'Engiadina e las aucas na san betg viver senza aua. Ier sonda èn ellas vegnidas transportadas dal domicil d’enviern en lur lieu da lavur, numnadamain en la palì en l’Engiadin’Ota.