Ils trais projects duain vegnir coordinads uschia che las lavurs han in effect uschè pitschen sco pussaivel per la populaziun e la cuntrada, sco las organisaziuns participadas scrivan.
Midada da la via da l'Engiadina (H27)
La via da l'Engiadina vegn il futur a svanir sut La Punt en in tunnel da 600 meters lunghezza. Per quai vegn ella stuschada da direcziun Bever pli datiers da la plaunca. Plinavant datti avant Madulain ina nova rundella ed ina punt sur l'En. Il project custa 83,5 milliuns francs e duai esser a fin l'onn 2032.
Era la viafier vegn stuschada
Sper la via vegn era il trassé da la Retica stuschada en direcziun plaunca. Entras quai ha il tschancun tranter Bever e La Punt be pli dus carauns enstagl da quatter sco fin uss. Uschia pon ils trens charrar marcantamain pli spert, ins possia spargnar 40 secundas temp da viadi. La Retica dovria quest temp per augmentar la stabilitad da l'urari e pussibilitar ulteriuras colliaziuns. Tranter auter duai in nov tren pendular colliar ils lieus tranter Zuoz e San Murezzan en in tact da mes’ura. Quest project custa radund 23 milliuns francs.
La natira profitescha
La midada da via e viafier pussibilitescha il davos pass da revitalisaziun da l'En en l'Engiadin'Ota. Entras quai po il flum sa derasar era da la vart sanestra dal flum. Plinavant vegn era il dutg da Chamuera renatiralisà datiers da Chamues-ch. Dals custs da radund 52 milliuns francs surpiglia la Confederaziun 80%. Quant ch'il chantun contribuescha n'è anc betg cler e la vischnanca rimna daners d'autras organisaziuns.
-
Bild 1 von 2Legenda: Datiers da Chames-ch datti cun la revitalisaziun era in nov lai da nudar, il Lejet da Saletschas. Pablo Horvath Architekt
-
Bild 2 von 2Legenda: Pablo Horvath Architekt